Monday 17th of December 2018

മുലയൂട്ടല്‍ കേന്ദ്രം ഉദ്ഘാടനം ചെയ്തു

Category: Wayanad
Published: Monday, 10 December 2018
 
വയനാട് : ജില്ലയില്‍ പൊതുസ്ഥലത്തെ രണ്ടാമത്തെ മുലയൂട്ടല്‍ കേന്ദ്രം സുല്‍ത്താന്‍ ബത്തേരി നഗരസഭാ ബസ്സ്റ്റാന്‍ഡില്‍ തുറന്നു. നാഷനല്‍ ഹെല്‍ത്ത് മിഷന്‍ സുല്‍ത്താന്‍ ബത്തേരി നഗരസഭയുമായി ചേര്‍ന്നാണ് യാത്രക്കാരായ അമ്മമാര്‍ക്ക് സൗകര്യമൊരുക്കിയത്. സുരക്ഷിതമായി മുലയൂട്ടാനുള്ള സാഹചര്യമൊരുക്കുകയാണ് ലക്ഷ്യം. മുലപ്പാലിന്റെ ആവശ്യകയെക്കുറിച്ചുള്ള ബോധവത്ക്കരണവും കേന്ദ്രത്തിലൂടെ ലക്ഷ്യമിടുന്നു. ഒരു കേന്ദ്രത്തിന് അമ്പതിനായിരത്തോളം രൂപയാണ് ചെലവ്. രണ്ടുമാസം മുമ്പ് ഉദ്ഘാടനം ചെയ്ത മാനന്തവാടി മുനിസിപ്പല്‍ ബസ്സ്റ്റാന്‍ഡിലെ മുലയൂട്ടല്‍ കേന്ദ്രം വന്‍വിജയമാണ്. ബന്ധപ്പെട്ട തദ്ദേശസ്ഥാപനങ്ങള്‍ സ്ഥലമൊരുക്കിയാല്‍ പ്രധാന ബസ്സ്റ്റാന്‍ഡുകളിലൊക്കെ ഈ സംവിധാനമൊരുക്കാനാണ് നാഷനല്‍ ഹെല്‍ത്ത് മിഷന്റെ ലക്ഷ്യം. സുല്‍ത്താന്‍ ബത്തേരിയിലെ മുലയൂട്ടല്‍ കേന്ദ്രം നഗരസഭ ചെയര്‍മാന്‍ ടി.എല്‍. സാബു ഉദ്ഘാടനം ചെയ്തു. 
              ക്ഷേമകാര്യ സ്റ്റാന്റിങ് കമ്മിറ്റി ചെയര്‍പേഴ്‌സണ്‍ പി.കെ. സുമതി അധ്യക്ഷത വഹിച്ചു. സിഡിഎസ് ചെയര്‍പേഴ്‌സണ്‍ നീതു മനോജ്, ഐസിഡിഎസ് സൂപ്പര്‍വൈസര്‍ സാലി, കൗണ്‍സിലര്‍മാരായ എല്‍സി പൗലോസ്, ശരത്ത് ചടങ്ങില്‍ സംബന്ധിച്ചു. ആരോഗ്യകേരളം ജില്ലാ പ്രോഗ്രാം മാനേജര്‍ ഡോ. അഭിലാഷ് സ്വാഗതവും ആരോഗ്യകേരളം ജില്ലാ കോര്‍ഡിനേറ്റര്‍ സജേഷ് ഏലിയാസ് നന്ദിയും പറഞ്ഞു.