Saturday 24th of August 2019

വോട്ടിംഗ് യന്ത്രങ്ങളുടെ കമ്മീഷനിംഗ് തുടങ്ങി

Category: Pathanamthitta Published: Tuesday, 16 April 2019
 
 
പത്തനംതിട്ട:  ലോക്സഭാ തെരഞ്ഞെടുപ്പിനോട് അനുബന്ധിച്ച് പത്തനംതിട്ട മണ്ഡലത്തില്‍ ഉപയോഗിക്കുന്ന വോട്ടിംഗ് യന്ത്രങ്ങളുടെയും വിവിപാറ്റിന്റെയും കമ്മീഷനിംഗിന് പൂര്‍ത്തിയായി. കമ്മീഷനിംഗിന്റെ ഭാഗമായി ബാലറ്റ് യൂണിറ്റ്, കണ്‍ട്രോള്‍ യൂണിറ്റ്, വിവിപാറ്റ് എന്നിവ വോട്ട് ചെയ്യുന്നതിന് സജ്ജമാക്കുന്ന പ്രവര്‍ത്തനങ്ങളാണ് ആരംഭിച്ചത്.
 
തരംതിരിക്കലിനു ശേഷം അതത് മണ്ഡലങ്ങളിലെ സ്ട്രോംഗ് റൂമുകളില്‍ സൂക്ഷിച്ചിരിക്കുന്ന വോട്ടിംഗ് യന്ത്രങ്ങളും വിവിപാറ്റും രാഷ്ട്രീയ പാര്‍ട്ടി പ്രതിനിധികളുടെ സാന്നിധ്യത്തില്‍ ഉറപ്പുവരുത്തിയതിനു ശേഷമാണ് കമ്മീഷനിംഗിനായി കൗണ്ടറുകളിലേക്ക് എത്തിച്ചത്. 
 
കാഞ്ഞിരപ്പള്ളി-പൂഞ്ഞാര്‍ നിയോജകമണ്ഡലങ്ങളിലെ അമല്‍ജ്യോതി എന്‍ജിനിയറിംഗ് കോളജ്, തിരുവല്ല നിയോജകമണ്ഡലത്തിലെ തിരുവല്ല മാര്‍ത്തോമ്മാ കോളജ്, റാന്നി നിയോജകമണ്ഡലത്തിലെ റാന്നി സെന്റ് തോമസ് കോളജ്, ആറന്മുള നിയോജകമണ്ഡലത്തിലെ മൈലപ്ര മൗണ്ട് ബഥനി സ്‌കൂള്‍, കോന്നി നിയോജകമണ്ഡലത്തിലെ കോന്നി അമൃത വിദ്യാലയം, അടൂര്‍ നിയോജകമണ്ഡലത്തിലെ അടൂര്‍ ബിഎഡ് സെന്റര്‍ എന്നീ സ്‌ട്രോംഗ് റൂമുകളിലാണ് കമ്മീഷനിംഗ് നടക്കുന്നത്. 
 
ഓരോ നിയമസഭാ മണ്ഡലങ്ങളിലെയും ബൂത്തുകളിലേക്ക് ലഭ്യമാക്കേണ്ട വോട്ടിംഗ് യന്ത്രങ്ങളും വിവിപാറ്റും ഏതൊക്കെയെന്ന് നിശ്ചയിച്ച് ബാലറ്റ് യൂണിറ്റില്‍ ബാലറ്റ് പേപ്പര്‍ സെറ്റ് ചെയ്ത് കണ്‍ട്രോള്‍ യൂണിറ്റും സജ്ജമാക്കും. ഇതിനു ശേഷം മോക്‌പോള്‍ നടത്തി കൃത്യത ഉറപ്പു വരുത്തിയതിനു ശേഷം സ്ട്രോംഗ് റൂമുകളിലേക്ക് മാറ്റും.  
 
ഏതെങ്കിലും മെഷീന്‍ തകരാറിലായാല്‍ പരിഹരിക്കുന്നതിനായി റിസര്‍വ് ആയി കൂടുതല്‍ മെഷീനുകള്‍ ഓരോ നിയോജകമണ്ലങ്ങളിലേക്കും കരുതിയിട്ടുണ്ട്. കമ്മീഷനിംഗ് പ്രക്രിയ പൂര്‍ത്തിയാക്കുന്നതിനു മുന്‍പായി അഞ്ചു ശതമാനം മോക്പോള്‍ ഉറപ്പു വരുത്തും. ഒരു ശതമാനം മെഷീനില്‍ 1200 വോട്ട്, രണ്ടു ശതമാനം മെഷീനുകളില്‍ 1000 വോട്ട്, രണ്ടു ശതമാനം മെഷീനുകളില്‍ 500 വോട്ട് എന്നിങ്ങനെയാണ് അഞ്ചു ശതമാനം മോക്പോള്‍.