Monday 22nd of July 2019

ജലാധരന് ലഭിച്ചത് പുതുജീവന്‍

Category: Main News Published: Wednesday, 15 May 2019
 
 
കൊല്ലം: മരണത്തെ മുഖാമുഖം കണ്ട ജലാധരന്‍ (60) ജീവിതത്തിലേക്ക് നടന്നു കയറി. ജില്ലാ ആശുപത്രിയില്‍ കടുത്ത നെഞ്ചുവേദനയുമായി എത്തിയ തെക്കേവിള സ്വദേശി ജലാധരനാണ് ആന്‍ജിയോപ്ലാസ്റ്റിയിലൂടെ പുതുജീവന്‍ കിട്ടിയത്. ജില്ലയില്‍ സര്‍ക്കാര്‍ മേഖലയില്‍ ആദ്യമായാണ് ഹൃദ്രോഗികള്‍ക്ക് ആന്‍ജിയോപ്ലാസ്റ്റി സൗകര്യം ലഭിക്കുന്നത്. 
 
കഴിഞ്ഞ ദിവസം രാത്രി 11ന് ആയിരുന്നു ജലാധരനെ അത്യാഹിത വിഭാഗത്തില്‍ പ്രവേശിപ്പിച്ചത്. കാര്‍ഡിയോളജി വിഭാഗം ഡോക്ടര്‍മാര്‍ രോഗിയെ പരിശോധിച്ചു. അതീവ ഗുരുതരാവസ്ഥയിലുള്ള ഹൃദയാഘാതമാണെന്ന് കണ്ടതോടെ ആന്‍ജിയോപ്ലാസ്റ്റിക്ക് വിധേയമാക്കുകയായിരുന്നു. ഹൃദയത്തിലെ ഇടത് ധമനി 100 ശതമാനവും അടഞ്ഞ് ഹൃദയത്തിന്റെ പമ്പിങ് നിലച്ചുകൊണ്ടിരിക്കുന്ന അവസ്ഥയിലായിരുന്നു ഇയാള്‍. ഹൃദയത്തിന്റെ ഏറ്റവും പ്രധാനപ്പെട്ട ഇടത്തെ രക്തധമനിയുടെ തുടക്കം മുതല്‍ രക്തം കട്ടപിടിച്ച് അടഞ്ഞ് കിടക്കുകയായിരുന്നു. 
 
ഇന്‍ട്രാകൊറോണറി മൈക്രോ കത്തീറ്റര്‍ ആസ്പിറേഷന്‍ വഴി കട്ടപിടിച്ച രക്തം നീക്കംചെയ്തു. തുടര്‍ന്ന് രക്തം കട്ടപിടിക്കാതിരിക്കാനുള്ള മരുന്നുകള്‍ ഹൃദയധമനികളിലേക്ക് നേരിട്ട് നല്‍കുകയും ചെയ്തു. കൂടാതെ ബലൂണ്‍ ആന്‍ജിയോപ്ലാസ്റ്റി നടത്തി ബ്ലോക്കുള്ള ഭാഗം വികസിപ്പിച്ച് രക്തയോട്ടം പുനഃസ്ഥാപിച്ചു. രോഗി ഐസിയുവില്‍ സുഖം പ്രാപിച്ചുവരുന്നു. 
 
ഡോ ബിജേഷ്, ഹെഡ് നഴ്‌സ് ഷൈനി, സ്റ്റാഫ് നഴ്‌സുമാരായ പി എ അഞ്ജു, ഷഹുബാനത്ത്, വനജ, ജെസ്സി, ആര്യ, വി എസ് അഞ്ജു, കാത്ത്‌ലാബ് ടെക്‌നീഷ്യന്‍മാരായ മനോജ് എന്നിവരാണ് ചികിത്സക്ക് നേതൃത്വം നല്‍കിയത്. ഇവരെ ഡെപ്യൂട്ടി ഡിഎംഒ ഡോ ജയശങ്കര്‍, സൂപ്രണ്ട് ഡോ വസന്തദാസ് അനുമോദിച്ചു. കാത്ത്‌ലാബ് ആരംഭിച്ചതു മുതല്‍ ഇതുവരെ 25 ല്‍ പരം രോഗികള്‍ക്ക് ചികിത്സ നല്‍കാന്‍ സാധിച്ചു.
 
Hits: 86