Thursday 23rd of May 2019

തദ്ദേശസ്ഥാപനങ്ങള്‍ക്ക് അധിക തുക നല്‍കി മാലിന്യ സംസ്‌കരണം നടത്തും

Category: Kollam
Published: Wednesday, 22 May 2019

 
 
കൊല്ലം: തദ്ദേശസ്വയംഭരണ സ്ഥാപനങ്ങളുടെ 2019-20 വര്‍ഷത്തേക്കുളള വാര്‍ഷിക പദ്ധതി പരിഷ്‌കരിക്കുന്നതിന്റെ ഭാഗമായി മാലിന്യ സംസ്‌കരണ പദ്ധതികള്‍ക്ക് മുന്‍ഗണന നല്‍കും. പദ്ധതി വിഹിതത്തിന്റെ 10 ശതമാനം ജില്ലാ, ബ്ലോക്ക്, ഗ്രാമപഞ്ചായത്തുകളും 15 ശതമാനം മുനിസിപ്പാലിറ്റികളും കോര്‍പ്പറേഷനുകളും ശുചിത്വ മാലിന്യ സംസ്‌കരണ പദ്ധതികള്‍ക്കായി വകയിരുത്തണമെന്നാണ് സര്‍ക്കാര്‍ നിര്‍ദേശം. 
 
ശുചിത്വ കേരളം പദ്ധതിയില്‍ ഉള്‍പ്പെടുത്തി ശുചിത്വ മിഷന്‍ മുഖേന തദ്ദേശസ്വയംഭരണ സ്ഥാപനങ്ങള്‍ക്ക് അധിക ധനസഹായം ലഭ്യമാക്കുന്നുണ്ട്. കേന്ദ്ര-സംസ്ഥാനാവിഷ്‌കൃത പദ്ധതിയില്‍ ഉള്‍പ്പെടുത്തി തദ്ദേശസ്വയംഭരണ സ്ഥാപനങ്ങള്‍ക്ക് വിവിധ മാലിന്യ സംസ്‌കരണ പദ്ധതികള്‍ ഏറ്റെടുക്കുന്നതിനും ശുചിത്വ മിഷന്‍ മുഖേന ധനസഹായം നല്‍കും.
 
അജൈവമാലിന്യ സംസ്‌കരണത്തിന്റെ ഭാഗമായി പ്ലാസ്റ്റിക് അടക്കമുളള പാഴ്വസ്തുക്കള്‍ ശേഖരിച്ച് സൂക്ഷിക്കുന്നതിനും ഇനം തിരിച്ച് പുനചംക്രമണത്തിനും റോഡ് ടാറിംഗിനുമായി ഉപയോഗിക്കുന്നതിനും സംവിധാനം വേണം. എല്ലാ ഗ്രാമപഞ്ചായത്തുകളിലും മുനിസിപ്പിലാറ്റികളിലും മെറ്റീരിയല്‍ കളക്ഷന്‍ ഫെസിലിറ്റിയാണ് ഉറപ്പാക്കേണ്ടത്.  
 
ശേഖരിക്കുന്ന പാഴ്വസ്തുക്കളില്‍ പ്ലാസ്റ്റിക്ക് പൊടിച്ച് ടാറിംഗിന്  നല്‍കുന്നതിനും പുനഃചംക്രമണത്തിന് യോഗ്യമായവ പാഴ് വസ്തു വ്യാപാരികളെ ഏല്‍പ്പിക്കുന്നതിനുമായി ക്ലീന്‍കേരള കമ്പനിക്കാണ് കൈമാറേണ്ടത്. എല്ലാ ബ്ലോക്ക് പഞ്ചായത്തുകളിലും മുനിസിപ്പാലിറ്റികളിലും റിസോഴ്സ് റിക്കവറി ഫെസിലിറ്റി കേന്ദ്രങ്ങള്‍ സ്ഥാപിച്ച് ഇതു നടപ്പാക്കാം. ഇതിനാവശ്യമായ പ്രോജക്ടുകള്‍ വാര്‍ഷിക പദ്ധതിയില്‍ ഉള്‍പ്പെടുത്തണം. വിവിധ തദ്ദേശസ്വയംഭരണ സ്ഥാപനങ്ങളിലായി  489 മെറ്റീരിയല്‍ കളക്ഷന്‍ ഫെസിലിറ്റികളും 110 റിസോഴ്സ് റിക്കവറി ഫെസിലിറ്റി കേന്ദ്രങ്ങളും ഇതിനകം പൂര്‍ത്തീകരിച്ചിട്ടുണ്ട്. ഈ സാമ്പത്തിക വര്‍ഷം അവസാനിക്കുന്നതോടെ മറ്റിടങ്ങളിലും സമാന സംവിധാനങ്ങള്‍ ഒരുക്കുകയാണ് ലക്ഷ്യം.
 
അടുക്കളമാലിന്യം ഉള്‍പ്പെടുന്ന ജൈവ പാഴ്വസ്തുക്കള്‍ സംസ്‌കരിക്കുന്നതിന് ഉറവിടമാലിന്യ സംസ്‌കരണ സംവിധാനങ്ങള്‍ ഒരുക്കുന്നതിനാണ്  ശുചിത്വ മിഷന്‍ മുന്‍ഗണന നല്‍കുന്നത്. വീടുകളില്‍ താരതമ്യേന ചെലവ് കുറഞ്ഞ കിച്ചന്‍ബിന്‍, റിംഗ് കമ്പോസ്റ്റ്, പൈപ്പ് കമ്പോസ്റ്റ്, കലം കമ്പോസ്റ്റ്, ബയോ ഡൈജസ്റ്റര്‍ പോട്ട് തുടങ്ങിയവ സ്ഥാപിക്കുന്നതിനുളള സാമ്പത്തിക സഹായം തദ്ദേശസ്വയംഭരണ സ്ഥാപനങ്ങള്‍ നല്‍കും.  ഇത്തരം സംവിധാനങ്ങള്‍ക്ക് പരമാവധി 90 ശതമാനംവരെ സബ്സിഡി നല്‍കും. 
 
ചന്തകള്‍, പൊതു സ്ഥാപനങ്ങള്‍, പൊതുയിടങ്ങള്‍ എന്നിവിടങ്ങളില്‍ ജൈവ കമ്പോസ്റ്റിംഗ് സംവിധാനങ്ങള്‍ ഒരുക്കും. 75% സാമ്പത്തിക ശുചിത്വ മിഷന്‍ മുഖാന്തിരം നല്‍കും.ദ്രവമാലിന്യ സംസ്‌കരണ പദ്ധതിയില്‍ സെപ്റ്റേജ്/സ്വീവേജ് ട്രീറ്റ്മെന്റ് പ്ലാന്റുകള്‍ സ്ഥാപിക്കുന്നതിന് മുഖ്യപരിഗണന നല്‍കുകയാണ്. ജില്ലാ-താലൂക്ക് ആശുപത്രികളില്‍ ഇത്തരം പദ്ധതികള്‍ നടപ്പാക്കുന്നതിനുളള സാമ്പത്തിക സഹായവും സാങ്കേതികനിര്‍ദേശവും ശുചിത്വമിഷന്‍ നല്‍കും. മാര്‍ക്കറ്റുകള്‍, മത്സ്യചന്തകള്‍ എന്നിവിടങ്ങളിലും ദ്രവമാലിന്യ സംസ്‌കരണ പദ്ധതികള്‍ ഒരുക്കുന്നതിനുളള സാമ്പത്തിക സഹായവും ശുചിത്വ മിഷന്‍ ലഭ്യമാക്കും. 
 
2019-20 ലെ വാര്‍ഷിക പദ്ധതി ഭേദഗതിക്കുള്ള സമയ പരിധിയായ ജൂണ്‍ 12ന് മാലിന്യ സംസ്‌കരണ പ്രോജക്ടുകള്‍ തയ്യാറാക്കണമെന്ന് ശുചിത്വ മിഷന്‍ എക്സിക്യൂട്ടീവ് ഡയറക്ടര്‍ അറിയിച്ചു.