Sunday 16th of December 2018

വി.വി.പാറ്റ് മെഷീനുകളുടെ പരിശോധന ജില്ലയില്‍ പൂര്‍ത്തിയായി

Category: Ernakulam Published: Wednesday, 10 October 2018
എറണാകുളം: ചെയ്ത വോട്ട് ബോധ്യപ്പെട്ട് പുറത്തിറങ്ങാന്‍ സമ്മതിദായകര്‍ക്ക് അവസരമൊരുക്കുന്ന വോട്ടേഴ്‌സ് വെരിഫയബിള്‍ പേപ്പര്‍ ഓഡിറ്റ് ട്രയല്‍ വി.വി.പാറ്റ്  സംവിധാനത്തിന്റെപരിശോധന ജില്ലയില്‍ പൂര്‍ത്തിയായതായി ഇലക്ഷന്‍ ഡെപ്യൂട്ടി കളക്ടര്‍ ദിനേശ് കുമാര്‍ അറിയിച്ചു.  രേഖപ്പെടുത്തിയ വോട്ടു സംബന്ധിച്ച് ഉയര്‍ന്നു വരുന്ന വിവാദങ്ങള്‍ക്ക് പരിഹാരം കാണാന്‍ കേന്ദ്ര തിരഞ്ഞെടുപ്പ് കമ്മീഷന്‍ സജ്ജമാക്കിയ വി.വി.പാറ്റ്  നേരിട്ടു ബോധ്യപ്പെടാന്‍  അടുത്ത ലോകസഭാ തിരഞ്ഞെടുപ്പില്‍ അവസരം ലഭിയ്ക്കും.  3,280 മെഷീനുകളാണ് ജില്ലയില്‍ എത്തിച്ചിട്ടുളളത്.  ഹൈദ്രാബാദ് ഇലക്‌ട്രോണിക്‌സ് കോര്‍പ്പറേഷന്‍ ഓഫ് ഇന്ത്യയാണ് യന്ത്രങ്ങള്‍ വിതരണം ചെയ്തത്.   കോര്‍പ്പറേഷന്റെ 15 ഉദ്യോഗസ്ഥരാണ് മെഷീനുകള്‍ പരിശോധിച്ച് വോട്ടിങ്ങിന് സജ്ജമാക്കിയത്.  മെഷീനുകള്‍ സെന്‍ട്രല്‍ വെയര്‍ ഹൗസിങ് കോര്‍പ്പറേഷന്റെ കാക്കനാട് നിലംപതിഞ്ഞമുകള്‍ കേന്ദ്രത്തില്‍ സൂക്ഷിച്ചിരിയ്ക്കുകയാണ്.   
 
ഇനിമുതലുള്ള പൊതു തെരഞ്ഞെടുപ്പുകളിലെല്ലാം വി.വി.പാറ്റ് സംവിധാനത്തോടുകൂടിയ ഇലക്ട്രോണിക് വോട്ടിങ്  യന്ത്രങ്ങള്‍ ഉപയോഗിക്കുമെന്നാണ് കേന്ദ്ര തിരഞ്ഞെടുപ്പ് കമ്മീഷന്‍ അറിയിച്ചിട്ടുള്ളത്.  രാജ്യത്തെ 10.6 ലക്ഷത്തോളം വരുന്ന പോളിങ് സ്റ്റേഷനുകളില്‍ നൂറു ശതമാനം വി.വി.പാറ്റ് സംവിധാനം ഉറപ്പുവരുത്തും. ഉപയോഗിക്കാന്‍ കൂടുതല്‍ സൗകര്യമുള്ള ഇ.വി.എം മാനേജ്‌മെന്റ് സോഫ്റ്റ്‌വെയര്‍ അടുത്ത നിയമസഭാ തിരഞ്ഞെടുപ്പുകളില്‍ പരീക്ഷിക്കുമെന്നും അറിയിപ്പുണ്ട്.
 
ചെയ്ത വോട്ട് ഏതു സ്ഥാനാര്‍ഥിക്ക് രേഖപ്പെടുത്തിയെന്ന് വോട്ടര്‍ക്ക് കാണാവുന്ന സംവിധാനമാണ് വിവിപാറ്റ്.  വോട്ടിങ് യന്ത്രത്തോടു ചേര്‍ന്നാണ് വി.വി.പാറ്റ് ഉണ്ടാവുക.   വോട്ടിങ് യന്ത്രത്തിനൊപ്പം ഘടിപ്പിക്കുന്ന ഒരു പ്രിന്ററാണിത്.   വോട്ട് ലഭിച്ചയാളുടെ പേര്, ചിഹ്നം, ക്രമനമ്പര്‍ എന്നിവ പ്രിന്റ് ചെയ്ത സ്ലിപ് ഏഴ് സെക്കന്റ് പ്രദര്‍ശിപ്പിക്കും. പിന്നീട് തിരുത്തല്‍ സാധ്യമല്ല. സ്ലിപ് വോട്ടര്‍ക്ക് ലഭിയ്ക്കുകയുമില്ല.  സ്ലിപ് വോട്ടിങ് യന്ത്രത്തിലേയ്ക്കു തിരികെ പോകും.  വോട്ടിങിനെക്കുറിച്ച് പരാതി ഉയരുന്ന സാഹചര്യത്തില്‍ കോടതി ആവശ്യപ്പെട്ടാല്‍ മാത്രമേ ഇവ പുറത്തെടുക്കൂ.  സ്ലിപ്പുകള്‍ എണ്ണി പരിഹാരം കാണാം.