Thursday 21st of March 2019

എന്റെ വോട്ട് എന്റെ ശക്തി: സ്റ്റിക്കറുകള്‍ പുറത്തിറക്കി ഇലക്ഷന്‍ വിഭാഗം

Category: Ernakulam
Published: Wednesday, 20 March 2019
കാക്കനാട്: ഇലക്ഷന്‍ കമ്മീഷന്റെ തെരഞ്ഞെടുപ്പ് ബോധവത്കരണ പരിപാടികളുടെ ഭാഗമായി വാഹനങ്ങളില്‍ ഒട്ടിക്കുവാനുള്ള സ്റ്റിക്കറുകള്‍ പുറത്തിറക്കി. കാക്കനാട് സിവില്‍ സ്റ്റേഷന്‍ പരിസരത്ത് കെ.എസ്.ആര്‍.ടി.സി ബസ്സില്‍ സ്റ്റിക്കര്‍ പതിപ്പിച്ച് ജില്ലാ കളക്ടര്‍ കെ. മുഹമ്മദ് വൈ. സഫീറുള്ള  ജില്ലാതല വിതരണത്തിന് തുടക്കം കുറിച്ചു. 
 
    വിവിധ വാഹനങ്ങള്‍ക്കായി പല വലിപ്പത്തിലുള്ള സ്റ്റിക്കറുകള്‍ ലഭ്യമാണ്. വിവിധ റോഡ് ട്രാന്‍സ്‌പോര്‍ട്ട് ഓഫീസുകളില്‍ സ്റ്റിക്കറുകള്‍ ലഭിക്കും. ജില്ലയിലെ എല്ലാ കെ.എസ്.ആര്‍.ടി.സി ബസ്സുകളില്‍ പതിപ്പിക്കുവാനുള്ള സ്റ്റിക്കറുകള്‍ ജില്ലാ ഡിപ്പോയില്‍ ലഭ്യമാക്കി. വിവിധ റസിഡന്റ് അസോസിയേഷനുകള്‍ വഴിയും സ്റ്റിക്കറുകള്‍ വിതരണം ചെയ്യും. സംസ്ഥാനത്തെ പൊതു തിരഞ്ഞെടുപ്പ് ദിനമായ ഏപ്രില്‍ 23 ആലേഖനം ചെയ്ത സ്റ്റിക്കറുകളില്‍ എന്റെ വോട്ട് എന്റെ അഭിമാനം, എന്റെ വോട്ട് എന്റെ അവകാശം എന്നിങ്ങനെ വ്യത്യസ്ത പ്രചോദന വാക്യങ്ങള്‍ ചേര്‍ത്തിരിക്കുന്നു. ഓട്ടോറിക്ഷകള്‍, സ്വകാര്യ വാഹനങ്ങല്‍, വിവിധ സര്‍ക്കാര്‍ വാഹനങ്ങള്‍ എന്നിവയില്‍ സ്റ്റിക്കറുകള്‍ പതിച്ചു.
 
    അസിസ്റ്റന്റ് കളക്ടര്‍ പാട്ടീല്‍ പ്രജ്ഞാല്‍ ലാഹേന്‍ സിങ്, ഇലക്ഷന്‍ ഡെപ്യൂട്ടി കളക്ടര്‍ എസ്. ഷാജഹാന്‍, സ്വീപ് ജില്ലാ നോഡല്‍ ഓഫീസര്‍ ബീന പി. ആനന്ദ്, റീജണല്‍ ട്രാന്‍സ്‌പോര്‍ട്ട് ഓഫീസര്‍ ജോജി പി. ജോസ് തുടങ്ങിയവര്‍ പങ്കെടുത്തു.