Sunday 22nd of April 2018

കുട്ടികളിലെ കലാവാസന വളര്‍ത്താന്‍ നാടകക്യാമ്പുകള്‍ സഹായകമാവും- സുധീര്‍ കരമന

Category: Alappuzha Published: Tuesday, 17 April 2018
ആലപ്പുഴ:കുട്ടികളിലെ കലാവാസന ഉണര്‍ത്തുന്നതില്‍ നാടക ക്യാമ്പുകള്‍  വലിയ പങ്കാണ് വഹിക്കുന്നതെന്ന്  നടന്‍ സുധീര്‍ കരമന പറഞ്ഞു. എസ് എല്‍ പുരം ഗാന്ധിസ്മാരക ഗ്രാമസേവ കേന്ദ്രത്തില്‍ നടക്കുന്ന കേരള സംസ്ഥാന ബാല സാഹിത്യ ഇന്‍സ്റ്റിറ്റ്യൂട്ടിന്റെ സര്‍ഗ്ഗ വസന്തം  നാടകക്യാമ്പ് ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. ഒരു വ്യക്തിയിലെ ശബ്ദനിയന്ത്രണം സാധ്യമാക്കുന്നതില്‍ നാടകക്കളരികള്‍ വലിയ പങ്കുവഹിക്കുന്നുണ്ടെന്നും സുധീര്‍ കരമന പറഞ്ഞു. മേയ് മാസത്തില്‍ സര്‍ക്കാര്‍ നടത്താന്‍ പോകുന്ന ഇന്റര്‍നാഷണല്‍ ചില്‍ഡ്രന്‍സ് ഫിലിം ഫെസ്റ്റിവല്‍ കുട്ടികള്‍ക്ക് കലാപരമായ ഒരു വിരുന്ന് ആയിരിക്കുമെന്നും സുധീര്‍ കരമന കൂട്ടിച്ചേര്‍ത്തു.
 
ചടങ്ങില്‍ കേരള സംസ്ഥാന ബാലസാഹിത്യ ഇന്‍സ്റ്റിറ്റ്യൂട്ട് ഡയറക്റ്റര്‍ പള്ളിയറ ശ്രീധരന്‍ അധ്യക്ഷത വഹിച്ചു. ചടങ്ങില്‍ ബാലസാഹിത്യ ഇന്‍സ്റ്റിറ്റ്യൂട്ട് എഡിറ്റോറിയല്‍ അസിസ്റ്റന്റ് ചിഞ്ചു പ്രകാശ് സ്വാഗതം ആശംസിച്ചു. ബാലസാഹിത്യ ഇന്‍സ്റ്റിറ്റ്യൂട്ട് മുന്‍ ഡയറക്ടര്‍ നെടുമുടി ഹരികുമാര്‍, ഗാന്ധിസ്മാരക ഗ്രാമസേവ കേന്ദ്രം പ്രസിഡന്റ് രവി പാലത്തുങ്കല്‍ എന്നിവര്‍ ആശംസകള്‍ നേര്‍ന്നു. ഗാന്ധിസ്മാരക ഗ്രാമസേവകേന്ദ്രം ജനറല്‍ സെക്രട്ടറി രമ രവീന്ദ്രമേനോന്‍ നന്ദി പ്രകാശിപ്പിച്ചു.ഏപ്രില്‍ പതിനെട്ടുവരെ നടക്കുന്ന ത്രിദിന നാടകക്യാമ്പിന്റെ ഡയറക്ടര്‍ സാഹിത്യകാരന്‍ സെബാസ്റ്റ്യന്‍ പള്ളിത്തോടാണ്.നാടകപ്രവര്‍ത്തകരായ നിഷാദ് പുത്തൂര്‍, ബെന്നി പി വി എന്നിവരും ക്ലാസ്സുകള്‍ നയിക്കും. ക്യാമ്പിന്റെ മൂന്നാം ദിവസം കുട്ടികള്‍ തന്നെ അണിയിച്ചൊരുക്കുന്ന നാടകങ്ങള്‍ അരങ്ങേറുന്നതോടെ സര്‍ഗ്ഗ വസന്തം 2018ന് തിരശീല വീഴും.