Saturday 21st of April 2018

കൃഷിഭൂമി വായ്പാ പദ്ധതിക്ക് അപേക്ഷിക്കാം

Category: Press Release
Published: Friday, 20 April 2018
തിരുവനന്തപുരം: സംസ്ഥാന പട്ടികജാതി/പട്ടികവർഗ വികസന കോർപ്പറേഷന്റെ കൃഷിഭൂമി വായ്പാ പദ്ധതിയിൽ പട്ടികജാതിയിൽപ്പെട്ട അർഹരായ ഭൂരഹിതരായ കർഷക തൊഴിലാളികൾക്ക് അപേക്ഷിക്കാം. അഞ്ച് ലക്ഷം രൂപയാണ് പദ്ധതി തുക. അപേക്ഷകർ പട്ടികജാതിയിൽപ്പെട്ടവരും 21 നും 55 നും മധ്യേ പ്രായമുള്ളവരുമായിരിക്കണം.ഗ്രാമപ്രദേശങ്ങളിലുള്ളവരുടെ കുടുംബ വാർഷിക വരുമാനം 98,000 രൂപയിലും നഗരപ്രദേശങ്ങളിലുള്ളവർക്ക് 1,20,000 രൂപയിലും കവിയാൻ പാടില്ല. വായ്പ ലഭിക്കുന്നവർ വായ്പാതുക കൊണ്ട് വരുമാനദായകമായ 30 സെന്റ് കൃഷിഭൂമിയെങ്കിലും വാങ്ങിയിരിക്കണം. മൊത്തം പദ്ധതി തുകയിൽ പരമാവധി 50,000 രൂപ വരെ സർക്കാർ അനുവദിക്കുന്ന മുറയ്ക്ക് സബ്‌സിഡിയായി ലഭിക്കും. 
 
വായ്പാ തുക നിശ്ചിത കാലപരിധിക്കുള്ളിൽ ആറ് ശതമാനം പലിശ സഹിതം തിരിച്ചടയ്ക്കണം. തിരിച്ചടവിൽ വീഴ്ച വരുത്തുന്നവർ രണ്ട് ശതമാനം പിഴപ്പലിശ അടയ്ക്കണം. വാങ്ങുന്ന ഭൂമി കൃഷിക്കനുയോജ്യമായിരിക്കണം. അപേക്ഷകന്റേയും പങ്കാളിയുടെയും (ഭാര്യ/ഭർത്താവ്) കൂട്ടുടമസ്ഥതയിൽ രജിസ്റ്റർ ചെയ്യണം. വായ്പാ തിരിച്ചടവ് പൂർണമായി തീരുന്നതുവരെ കോർപ്പറേഷന് പണയപ്പെടുത്തണം. ഭൂമിയുടെ രജിസ്‌ട്രേഷന് ആവശ്യമായ ചെലവുകൾ ഗുണഭോക്താവ് വഹിക്കണം. ഒരു കുടുംബത്തിൽ നിന്നും ഒരാൾക്ക് മാത്രമേ അപേക്ഷിക്കാൻ അർഹതയുള്ളൂ. അപേക്ഷകർ വിവാഹിതരായിരിക്കണം. മുമ്പ് കോർപ്പറേഷനിൽ നിന്നും കൃഷിഭൂമി വായ്പ ലഭിച്ചവർ വീണ്ടും അപേക്ഷിക്കരുത്. 
 
താൽപ്പര്യമുള്ളവർക്ക് അപേക്ഷാ ഫോറവും കൂടുതൽ വിവരങ്ങളും ബന്ധപ്പെട്ട ജില്ലാ ഓഫീസുകളിൽ നിന്നും ലഭിക്കും. ജാതി, കുടുംബ വാർഷിക വരുമാനം (ആറ് മാസത്തിനുള്ളിൽ ലഭിച്ചത്), വയസ് എന്നിവ തെളിയിക്കുന്നതിനാവശ്യമായ രേഖകളുടെ പകർപ്പ് സഹിതം പൂരിപ്പിച്ച അപേക്ഷ മേയ് 20 ന് വൈകിട്ട് അഞ്ച് മണിക്ക് മുമ്പ് ബന്ധപ്പെട്ട ജില്ലാ ഓഫീസിൽ നൽകണം. ബന്ധപ്പെട്ട രേഖകളില്ലാതെ സമർപ്പിക്കുന്ന അപേക്ഷകൾ പരിഗണിക്കില്ല.