Tuesday 18th of June 2019

പ്ലസ് വണ്‍ പ്രവേശനം; സ്‌കൂളുകളില്‍ ഹെല്‍പ്‌ഡെസ്‌ക് സംവിധാനം

Category: Press Release
Published: Friday, 10 May 2019
തിരുവനന്തപുരം: ഏകജാലക സംവിധാനത്തിലൂടെയുളള പ്ലസ് വണ്‍ പ്രവേശനത്തിനായുളള അപേക്ഷകള്‍ ഓണ്‍ലൈനായി സമര്‍പ്പിക്കാന്‍ സ്‌കൂളുകളിലെ കമ്പ്യൂട്ടര്‍ ലാബ്/ഇന്റര്‍നെറ്റ് സൗകര്യവും വേണ്ടുന്ന മറ്റു മാര്‍ഗ്ഗനിര്‍ദ്ദേശവും നല്‍കുവാന്‍ സ്‌കൂള്‍തലത്തില്‍ ഹെല്‍പ്പ് ഡെസ്‌കുകള്‍ സംസ്ഥാനത്തെ എല്ലാ സര്‍ക്കാര്‍/എയ്ഡഡ് ഹയര്‍സെക്കണ്ടറി സ്‌കൂളുകളിലും പ്രിന്‍സിപ്പല്‍മാരുടെ നേതൃത്തില്‍ സജ്ജമാക്കി. വെബ്‌സൈറ്റില്‍ നിന്നും അതാത് ജില്ലകളുടെ പ്രോസ്പക്ടസ് പ്രിന്റ് എടുത്ത് എല്ലാ സര്‍ക്കാര്‍/എയ്ഡഡ് ഹയര്‍സെക്കണ്ടറി സ്‌കൂളുകളിലെ നോട്ടീസ് ബോര്‍ഡിലും പ്രദര്‍ശിപ്പിക്കുവാനുളള നടപടികള്‍ പ്രിന്‍സിപ്പല്‍മാര്‍ സ്വീകരിക്കും. ഓരോ ദിവസവും കുറഞ്ഞത് രണ്ട് അധ്യാപകരെങ്കിലും സ്‌കൂള്‍തല ഹെല്‍പ്പ് ഡെസ്‌കുകളില്‍ പ്രവൃത്തി സമയം മുഴവനും പ്രവര്‍ത്തിക്കുന്നുണ്ടെന്ന് പ്രിന്‍സിപ്പല്‍മാര്‍ ഉറപ്പുവരുത്തണമെന്ന് ഹയര്‍സെക്കണ്ടറി ഡയറക്ടര്‍ നിര്‍ദ്ദേശിച്ചു. ഇന്ന് മുതല്‍ www.hscap.kerala.gov.in എന്ന വെബ്‌സൈറ്റിലൂടെ അപേക്ഷ നല്‍കാം.
അപേക്ഷയുടെ രണ്ട് പേജുളള പ്രിന്റൗട്ടും അനുബന്ധരേഖകളും ജില്ലയിലെ ഏതെങ്കിലും ഒരു സര്‍ക്കാര്‍/എയ്ഡഡ് ഹയര്‍സെക്കണ്ടറി സ്‌കൂളില്‍ പരിശോധനയ്ക്ക് 16നകം സമര്‍പ്പിക്കണം. ഓണ്‍ലൈനായി അപേക്ഷ അന്തിമമായി സമര്‍പ്പിച്ച ശേഷം ഏതെങ്കിലും തരത്തിലുളള തെറ്റുകള്‍ കണ്ടെത്തിയാല്‍ വിവരം ഓണ്‍ലൈന്‍ അപേക്ഷയുടെ പ്രിന്റൗട്ടും അനുബന്ധ രേഖകളും നല്‍കുന്ന സ്‌കൂള്‍ പ്രിന്‍സിപ്പാളിനെ അറിയിച്ച് തിരുത്താം.