Saturday 17th of November 2018

അബു - ചാത്തുക്കുട്ടി സ്‌റ്റേഡിയം നവീകരണ പ്രവൃത്തി ഉദ്ഘാടനം ചെയ്തു

Category: Sports
Published: Wednesday, 07 November 2018
കണ്ണൂര്‍  : ധര്‍മടം ഗ്രാമപ്പഞ്ചായത്ത് അബു-ചാത്തുക്കുട്ടി സ്റ്റേഡിയത്തിന്റെ നവീകരണ പ്രവൃത്തിയുടെ ഉദ്ഘാടനം വ്യവസായകായിക വകുപ്പ് മന്ത്രി ഇ പി ജയരാജന്‍ നിര്‍വഹിച്ചു. കായിക രംഗത്തെ മികവുറ്റതാക്കാനുള്ള നടപടികളാണ് സര്‍ക്കാര്‍ സ്വീകരിച്ചു വരുന്നതെന്ന് അദ്ദേഹം പറഞ്ഞു. സംസ്ഥാനത്തിന്റെ വിവിധ ഭാഗങ്ങളില്‍ 57 സ്റ്റേഡിയങ്ങള്‍ നിര്‍മിക്കുകയോ, പുതുക്കിപ്പണിയുകയോ ചെയ്യുന്നതിന് 700 കോടി രൂപയാണ് സര്‍ക്കാര്‍ കിഫ്ബി വഴി കണ്ടെത്തിയിട്ടുള്ളത്. ഇതില്‍ 34 സ്റ്റേഡിയങ്ങളുടെ പ്രവൃത്തികള്‍ തുടങ്ങി. കണ്ണൂര്‍ ജില്ലയിലെ എട്ട് സ്റ്റേഡിയങ്ങള്‍ക്ക് ഇതിന്റെ പ്രയോജനം ലഭിക്കുമെന്നും മന്ത്രി പറഞ്ഞു.
 
      ഒരു പദ്ധതി തുടങ്ങിയാല്‍ അനിശ്ചിതമായി നീട്ടിക്കൊണ്ടു പോകലല്ല, എത്രയും പെട്ടെന്ന് പൂര്‍ത്തീകരിക്കലാണ് സര്‍ക്കാര്‍ നയം. അബു-ചാത്തുക്കുട്ടി സ്റ്റേഡിയത്തിന്റെ നവീകരണ പ്രവൃത്തി ഒന്‍പതു മാസം കൊണ്ട് പൂര്‍ത്തിയാക്കുമെന്നും മന്ത്രി പറഞ്ഞു. പി കെ ശ്രീമതി ടീച്ചര്‍ എംപി അധ്യക്ഷത വഹിച്ചു. കെ കെ രാഗേഷ് എം പി മുഖ്യാതിഥിയായിരുന്നു. ജില്ലാ പഞ്ചായത്ത് പ്രസിഡന്റ് കെ വി സുമേഷ്, ജില്ലാ സ്‌പോര്‍ട്‌സ് കൗണ്‍സില്‍ പ്രസിഡന്റ് ഒ കെ വിനീഷ്, കായിക വകുപ്പ് സെക്രട്ടറി ഡോ. ജയതിലക്, ഡയരക്ടര്‍ സഞ്ജയ് കുമാര്‍, ഗ്രാമ പഞ്ചായത്ത് പ്രസിഡന്റ് സി പി ബേബി സരോജം, വൈസ് പ്രസിഡന്റ് പൊലപ്പാടി രമേശന്‍, ബ്ലോക്ക് പഞ്ചായത്തംഗം കനകവല്ലി, കുന്നുമ്മല്‍ ചന്ദ്രന്‍, കെ ഗോപീകൃഷ്ണന്‍ തുടങ്ങിയവര്‍ സംസാരിച്ചു.