Saturday 21st of April 2018

ലില്ലിയേയും മറികടന്നു; ചരിത്രനേട്ടവുമായി അശ്വിന്‍

Category: Sports
Published: Monday, 27 November 2017
നാഗ്പൂര്‍: അതിവേഗത്തില്‍ 300 വിക്കറ്റുകള്‍ കൊയ്തുകൂട്ടിയ ആര്‍. അശ്വിന് ക്രിക്കറ്റില്‍ ചരിത്രനേട്ടം. മുന്നൂറ് വിക്കറ്റ് നേട്ടം ഏറ്റവും കുറച്ചു ടെസ്റ്റുകള്‍കൊണ്ട് എറിഞ്ഞിടുന്ന ആദ്യ ബൗളറാണ് അശ്വിന്‍. വെറും 54 ടെസ്റ്റുകളേ ഇതിനായി അശ്വിന് വേണ്ടിവന്നുള്ളൂ. 
ഓസ്‌ട്രേലിയയുടെ ഇതിഹാസതാരം ഡെന്നീസ് ലില്ലിയെയാണ് അശ്വിന്‍ ഈ റെക്കോഡില്‍ പിന്നിലാക്കിയത്. 56 ടെസ്റ്റുകളില്‍നിന്നാണ് ലില്ലി ഈ നേട്ടം കെട്ടിപ്പടുത്തത്. 
36 വര്‍ഷം പഴക്കമുള്ള റെക്കോഡാണ് അശ്വിന്‍ തിരുത്തിയെഴുതിയത്. 1981 നവംബര്‍ 27 നായിരുന്നു ലില്ലിയുടെ റെക്കോഡ് പിറന്നത്. 
വിക്കറ്റ് വേട്ടയിലെ ഒന്നാമനായ ശ്രീലങ്കന്‍ താരം മുത്തയ്യ മുരളീധരന് ഈ നേട്ടം കൈവരിക്കാനായത് 58 ടെസ്റ്റുകളില്‍ നിന്നാണ്. ഷെയ്ന്‍ വോണിന് വേണ്ടിവന്നത് 63 ടെസ്റ്റുകളും. 
ഏറ്റവും കുറവ് പന്തുകളില്‍നിന്നും 300 വിക്കറ്റ് നേടിയതിന്റെ റെക്കോഡും ഇതോടെ അശ്വിന്റെ പേരിലായി. 15,634 പന്തുകളില്‍നിന്നാണ് അശ്വിന്‍ 300 തികച്ചത്. 18,501 പന്തുകളില്‍ 300 വിക്കറ്റ് കണ്ടെത്തിയ ഷെയ്ന്‍ വോണിന്റെ പേരിലായിരുന്നു ഇതുവരെ റെക്കോഡ്. മുത്തയ്യ മുരളീധരന്‍ (18,622), രങ്കണ ഹെറാത്ത് (19367), ഹര്‍ഭജന്‍ (19,667) എന്നിവര്‍ തെട്ടുപിറകേയുണ്ട്. 
അശ്വിന്റെ 300 ടെസ്റ്റ് വിക്കറ്റില്‍ 182 വിക്കറ്റുനേട്ടവും വിരാട് കോലി ക്യാപ്ടനായതിനു ശേഷം കളിച്ച 30 ടെസ്റ്റുകളില്‍നിന്നുള്ളതാണ്. തുടര്‍ച്ചയായ മൂന്നു വര്‍ഷം 50 ലധികം വിക്കറ്റുകള്‍ നേടുന്ന മൂന്നാമത്തെ താരവുമാണ് അശ്വിന്‍. 1993-1995 കാലഘട്ടത്തില്‍ വോണും 2000-2002 കാലഘട്ടത്തില്‍ മുരളീധരനും ഈ നേട്ടംകൊയ്തിരുന്നു. അശ്വിന്‍ 2015 ല്‍ 62 വിക്കറ്റും 2016ല്‍ 72 വിക്കറ്റും നേടി. 2017ല്‍ ഇതിനകം 52 വിക്കറ്റുകള്‍ സ്വന്തം പേരില്‍ എഴുതിച്ചേര്‍ത്തുകഴിഞ്ഞു.