Sunday 16th of December 2018

സിംബാബ്‌വെ പര്യടനം: രഹാനെ നയിക്കും

Category: Sports
Published: Monday, 29 June 2015
 
ന്യൂഡല്‍ഹി: അടുത്തമാസം സിംബാബ്‌വെയില്‍ പര്യടനം നടത്തുന്ന ഇന്ത്യന്‍ ക്രിക്കറ്റ് ടീമിനെ അജിങ്ക്യ രഹാനെ നയിക്കും. മുന്‍നിര താരങ്ങളായ എം.എസ്. ധോനി, വിരാട് കോലി, രോഹിത് ശര്‍മ, ആര്‍.അശ്വിന്‍ എന്നിവര്‍ക്ക് വിശ്രമം അനുവദിച്ചു. സഞ്ജുസാംസണ്‍, ഉമേഷ് യാദവ്, രവീന്ദ്ര ജഡേജ എന്നിവരെ ഒഴിവാക്കി. ഉമേഷ് യാദവിന് ഇന്ത്യ എ ടീമില്‍ അവസരം നല്‍കിയിട്ടുണ്ട്.  കേരളത്തിന്റെ സഞ്ജു സാംസന് രണ്ട് ടീമിലും അവസരം ലഭിച്ചില്ല. ചേതേശ്വര്‍ പൂജാരയാണ് എ ടീം ക്യാപ്റ്റന്‍. ദക്ഷിണാഫ്രിക്കയുടെയും ഓസ്‌ട്രേലിയയുടെയും എ ടീമുകള്‍ അടങ്ങുന്ന പരമ്പരയിലാണ് പൂജാരയുടെ നേതൃത്വത്തിലുള്ള ടീം കളിക്കുന്നത്. രാഹുല്‍ ദ്രാവിഡാണ് ടീം പരിശീലകന്‍. പതിനഞ്ചംഗ ടീമില്‍ സ്‌പെഷ്യലിസ്റ്റ് വിക്കറ്റ്കീപ്പര്‍മാര്‍ ആരും തന്നെയില്ല. റോബിന്‍ ഉത്തപ്പ, കേദാര്‍ ജാദവ്, അമ്പാട്ടി റായിഡു എന്നിവര്‍ക്കായിരിക്കും ധോനിക്ക് പകരം വിക്കറ്റ് കാക്കാനുള്ള ചുമതല. നീണ്ട ഇടവേളയ്ക്കുശേഷമാണ് റോബിന്‍ ഉത്തപ്പ ദേശീയ ടീമില്‍ തിരിച്ചെത്തുന്നത്. മനീഷ് പാണ്‌ഡെയും ബൗളര്‍ സന്ദീപ് ശര്‍മയുമാണ് ടീമിലെ പുതുമുഖങ്ങള്‍.
          ന്യൂഡല്‍ഹിയില്‍ നടന്ന സെലക്ഷന്‍ കമ്മിറ്റി യോഗത്തിന് ശേഷം ബി.സി.സി.ഐ. സെക്രട്ടറി അനുരാഗ് താക്കൂറാണ് ടീമിനെ പ്രഖ്യാപിച്ചത്.
 
ടീം: അജിങ്ക്യ രഹാനെ, മുരളി വിജയ്, അമ്പാട്ടി റായിഡു, മനോജ് തിവാരി, കേദാര്‍ ജാദവ്, റോബിന്‍ ഉത്തപ്പ, മനീഷ് പാണ്‌ഡെ, ഹര്‍ഭജന്‍സിങ്, അക്‌സര്‍ പട്ടേല്‍, കരണ്‍ ശര്‍മ, ധവാല്‍ കുല്‍ക്കര്‍ണി, സ്റ്റുവര്‍ട്ട് ബിന്നി, ഭുവനേശ്വര്‍ കുമാര്‍, മോഹിത് ശര്‍മ, സന്ദീപ് ശര്‍മ.
 
ഇന്ത്യ എ ടീം: ചേതേശ്വര്‍ പൂജാര (ക്യാപ്റ്റന്‍), കെ.എല്‍. രാഹുല്‍, അഭിനവ് മുകുന്ദ്, കരുണ്‍ നായര്‍, ശ്രേയസ് അയ്യര്‍, നമന്‍ ഓജ, വിജയ്ശങ്കര്‍, അമിത് മിശ്ര, പ്രഗ്യാന്‍ ഓജ, ശാര്‍ദുല്‍ താക്കൂര്‍, വരുണ്‍ ആരോണ്‍, അഭിമന്യൂ മിഥുന്‍, ഉമേഷ് യാദവ്, ശ്രേയസ് ഗോപാല്‍, ബി.അപരാജിത്.