Wednesday 17th of October 2018

ഏഷ്യന്‍ ഗ്രാന്‍ഡ്പ്രീ അത്‌ലറ്റിക്‌സ് ; ജിന്‍സണ്‍ ജോണ്‍സണ് സ്വര്‍ണ്ണം

Category: Sports
Published: Tuesday, 23 June 2015
ബാങ്കോക്ക്: ഏഷ്യന്‍ ഗ്രാന്‍ഡ്പ്രീ അത്‌ലറ്റിക്‌സിന്റെ ഒന്നാം പാദത്തില്‍ പുരുഷന്മാരുടെ 800 മീറ്ററില്‍ മലയാളി താരം ജിന്‍സണ്‍ ജോണ്‍സിന് സ്വര്‍ണ്ണം. മികച്ച പ്രകടനം കാഴ്ചവച്ച ഇന്ത്യന്‍ താരങ്ങള്‍ രണ്ട് സ്വര്‍ണവും രണ്ട് വെള്ളിയും മൂന്ന് വെങ്കലവുമടക്കം ഏഴ് മെഡലുകളാണ്കൊയ്തത്. ഷോട്ട്പുട്ടില്‍ ഇന്ദര്‍ജീത് സിങാണ് സ്വര്‍ണമെഡല്‍ ജേതാവ്. പുരുഷന്മാരുടെ 400 മീറ്റര്‍ ഓട്ടത്തില്‍ തമിഴ്‌നാട്ടുകാരന്‍ ആരോക്യ രാജീവും ലോങ്ജമ്പില്‍ അങ്കിത് ശര്‍മയും വെള്ളി നേടി. വെങ്കലമെഡലുകളെല്ലാം വനിതകള്‍ക്കാണ്. 100 മീറ്റര്‍ ഓട്ടത്തില്‍ ശ്രാബണി നന്ദയും 400 മീറ്റര്‍ ഓട്ടത്തില്‍ എം.ആര്‍. പൂവമ്മയും 800 മീറ്റര്‍ ഓട്ടത്തില്‍ എം. ഗോമതിയുമാണ് വെങ്കലം നേടിയവര്‍.
  കോഴിക്കോട് ജില്ലയിലെ ചക്കിട്ടപാറ സ്വദേശിയായ ജിന്‍സണ്‍ ഒരു മിനിറ്റ് 49.53 സെക്കന്‍ഡില്‍ ഓടിയെത്തിയാണ് സ്വര്‍ണമണിഞ്ഞത്. ശ്രീലങ്കയുടെ ഹെറാത്ത് ഇന്‍ഡൂറിലും ഇറാന്റെ അമീര്‍ മൊറാദിയും യഥാക്രമം വെള്ളിയും വെങ്കലവും നേടി. ഏഷ്യന്‍ അത്‌ലറ്റിക് ചാന്പ്യന്‍ഷിപ്പിലെ പ്രകടനത്തിന്റെ ആവര്‍ത്തനമാണ് ഹരിയാണക്കാരനായ ഇന്ദര്‍ജീത്ത് സിങ് ബാങ്കോക്കില്‍ പുറത്തെടുത്തത്. 19.83 മീറ്റര്‍ ദൂരത്തേക്ക് ഷോട്ട് പായിച്ചായിരുന്നു ഇന്ദര്‍ജീത്തിന്റെ സുവര്‍ണ നേട്ടം. ചൈനയുടെ വാങ് ഗുവാങ്ഫുവും(18.82മീ.) ഗുവോ യാന്‍ സിയാങ്ങും (18.79മീ.) രണ്ടും മൂന്നും സ്ഥാനങ്ങളിലെത്തി.