Sunday 21st of April 2019

കാന്‍സര്‍ വരുന്ന വഴി

Category: Life Style
Published: Saturday, 31 October 2015

ന്ത്യന്‍ ജനസംഖ്യയില്‍ നിലവില്‍ 10.8 ലക്ഷം കാന്‍സര്‍ രോഗികളുണ്ടെന്ന് ദേശീയ കാന്‍സര്‍ ഇന്‍സ്റ്റിറ്റ്യൂട്ടിന്റെ കണക്കുകള്‍ പറയുന്നു. വായിലും എല്ലുകളിലും സ്തനങ്ങളിലും കാന്‍സര്‍ ബാധിച്ചവരാണ് കൂടുതല്‍. കേരളത്തില്‍ ഒരു വര്‍ഷം മുപ്പതിനായിരത്തിലധികം കാന്‍സര്‍ രോഗങ്ങള്‍ റിപ്പോര്‍ട്ട് ചെയ്യപ്പെടുന്നു. അവയില്‍ കൂടുതലും സ്ത്രീകളെയാണ് ബാധിക്കുന്നതും .ഇന്ന് ഏറ്റവുമധികം ഭയവും ആശങ്കയുളവാക്കുന്ന രോഗമായി കാന്‍സര്‍ മാറിക്കഴിഞ്ഞു.

 

നേരത്തെ കണ്ടെത്തിയാല്‍ ചികിത്സിച്ചു ഭേദമാക്കാവുന്ന കാന്‍സര്‍ രോഗങ്ങള്‍ക്ക് ശരിയായ ചികിത്സ യഥാസമയം ലഭിക്കാത്തത്  രോഗിയെ  മരണത്തിലേക്ക് നയിക്കും. കാന്‍സര്‍ വരുന്നതിനുള്ള സാഹചര്യം, കാരണങ്ങള്‍ എന്നിവ നേരത്തെ മനസിലാക്കി കാന്‍സറിനെ അകറ്റി നിര്‍ത്താവുന്നതേയുള്ളൂ.

 

ശരീരകോശങ്ങളിലെ ഡി.എന്‍.എയില്‍ വരുന്ന മാറ്റങ്ങളാണ് യഥാര്‍ത്ഥത്തില്‍ കാന്‍സറിനു കാരണമാകുന്നത്. ഇവ പാരമ്പര്യമായി സംഭവിക്കാം. അല്ലാത്തവ സാഹചര്യങ്ങളുടെ ഫലമായി സംഭവിക്കാം. ഇത്തരത്തില്‍ കാന്‍സറിന് കാരണമാകുന്ന   രാസവസ്തുക്കള്‍ കാഴ്സിനോജനുകള്‍ എന്നാണ് അറിയപ്പെടുന്നത്. ഇന്റര്‍നാഷണല്‍ ഏജന്‍സി ഫോര്‍ കാന്‍സര്‍ റിസര്‍ച്ച് കാന്‍സറിലേക്ക് വഴി തെളിക്കുന്ന 116 ദൈനംദിന പ്രവര്‍ത്തികളുടെയും പദാര്‍ത്ഥങ്ങളുടെയും ഒരു പട്ടിക തന്നെ പ്രസിദ്ധപ്പെടുത്തിയിട്ടുണ്ട്  ദൈനംദിന ജീവിതത്തില്‍ നാമറിഞ്ഞോ അറിയാതെയോ ഇവയുമായി സമ്പര്‍ക്കത്തില്‍ വരാറുണ്ട്. തൊഴില്‍ മേഖല, ജീവിതരീതികള്‍, ഭക്ഷണക്രമം എന്നിവയാണ് കാഴ്സിനോജനുകള്‍ നമ്മളിലേക്കെത്തുന്ന പ്രധാന വഴികള്‍. നിരന്തരമായുള്ള കാര്‍സിനോജെനുകളുടെ സാന്നിദ്ധ്യം ഒഴിവാക്കി കാന്‍സറിനെ ഒരു പരിധി വരെ പ്രതിരോധിക്കാം.

 

 

കാന്‍സര്‍ സാധ്യതയുള്ള തൊഴില്‍ മേഖലകള്‍

 

പെയിന്റിംഗ്, പെയിന്റ് നിര്‍മാണം

 

ലുക്കീമിയയും മൂത്രാശയ കാന്‍സറിനും വഴിവക്കുന്ന ബെന്‍സീന്‍, ലെഡ്ക്രോമേറ്റ്, അസ് ബസ്റ്റോസ് എന്നിവ ഈ മേഖലയില്‍ ഉപയോഗിച്ചു വരുന്നു.

 

തടി കൊണ്ടുള്ള ഗൃഹോപകരണ നിര്‍മാണം, തടിമില്ലുകള്‍

 

മരം കൊണ്ടുള്ള ഗൃഹോപകരണങ്ങള്‍ നിര്‍മിക്കുമ്പോള്‍ നിരന്തരമായി ശ്വസിക്കുന്ന മരപ്പൊടി കാന്‍സര്‍ സാധ്യത കൂടും. തടിമില്ലുകളില്‍ ജോലി ചെയ്യുന്നവര്‍ക്കും ഇത് ബാധകമാണ്.

 

റബ്ബര്‍ ടാപ്പിംങ് 

ലാറ്റക്സില്‍ ശ്വാസകോശാര്‍ബുദത്തിനും ലുക്കീമിയയും വഴിവക്കുന്ന രാസവസ്തുക്കള്‍ ഉണ്ട്

 

കല്‍ക്കരിയുമായി ബന്ധപ്പെട്ട മേഖല

 

 

യന്ത്രങ്ങള്‍ ഉപയോഗിച്ച് ചിമ്മ്നി വൃത്തിയാക്കുമ്പോള്‍ ശ്വസിക്കേണ്ടി വരുന്ന കല്‍ക്കരിയുടേയും തടി കത്തുന്നതു കൊണ്ടുള്ള പുകയും കാന്‍സറിനു കാരണമായേക്കാം. കല്‍ക്കരിയുമായി ബന്ധപ്പെട്ട ഏതൊരു തൊഴില്‍ മേഖലയിലും പ്രവര്‍ത്തിക്കുന്നവര്‍ ശാസ്ത്രീയമായ പ്രതിരോധ മാര്‍ഗങ്ങള്‍ സ്വീകരിക്കേണ്ടതാണ്. കല്‍ക്കരി, ഓക്സിജന്‍, കാര്‍ബണ്‍ഡൈഓക്സൈഡ് എന്നിവയുമായി പ്രവര്‍ത്തിച്ചുണ്ടാകുന്ന പുക കാന്‍സറിനു കാരണമാവാം. കോക്ക് ഇന്ധന നിര്‍മാണ മേഖലയിലും സമാനഫലങ്ങളാണ്.  

 

അലുമിനിയം, സ്റ്റീല്‍ നിര്‍മാണമേഖല

 

ഈ മേഖലയില്‍ ജോലി ചെയ്യുന്നവര്‍ കോള്‍ടാര്‍പിച്ചുമായി നിരന്തരം സമ്പര്‍ക്കത്തില്‍ വരുന്നു വിഷാംശം കലര്‍ന്ന പുക നിരന്തരം ശ്വസിക്കുന്നത് ബ്ലാഡര്‍ കാന്‍സര്‍ സാധ്യത ഉയര്‍ത്തുന്നു. ചില അലോയുകള്‍ നിര്‍മിക്കുമ്പോള്‍ ഉപയോഗിക്കുന്ന ആഴ്സനിക് ഏറ്റവും ശക്തമായ കാഴ്സിനോജനാണ്. ഇവ കുടിവെള്ളത്തില്‍ കലരുന്നതും അപകടമാണ് 

 

ചെരിപ്പു നിര്‍മാണം

 

മൂക്കിലെ കാന്‍സര്‍, ലുക്കിമീയ എന്നിവയ്ക്ക് കാരണമാകുന്ന ലതര്‍ സസ്റ്റ്, ബെന്‍സിന്‍  എന്നിവയാണ് ഷൂ, ചെരിപ്പു്  നിര്‍മാണ മേഖലയിലെ കാഴ്സിനോജെന്‍ സാന്നിദ്ധ്യം.

 

 

കാന്‍സറിലേക്ക് നയിക്കുന്ന ജീവിത രീതികളും ഭക്ഷണക്രമവും

 

നിരന്തരമായ പുകവലി, മദ്യപാനം,  എന്നിവ കാന്‍സര്‍ സാധ്യത കൂടും. ടുബാക്കോ ഉള്‍പ്പെടെയുള്ള ലഹരി വസ്തുക്കളുടെ ഉപയോഗം വായില്‍ കാന്‍സര്‍ വരുന്നതിന് കാരണമാണ്. പെട്രോള്‍, ഡീസല്‍, കല്‍ക്കരി, തടി തുടങ്ങിയ ജൈവ ഇന്ധനങ്ങള്‍  കത്തുമ്പോഴുണ്ടാകുന്ന പുക ശ്വസിക്കുന്നത് കാന്‍സര്‍ സാധ്യത കൂട്ടുന്നു. അള്‍ട്രാവയലറ്റ് രശ്മികള്‍, എക്സ് റേ എന്നിവയുമായി നിരന്തരസമ്പര്‍ക്കത്തില്‍ വരുന്നത് ത്വക്കിലെ അര്‍ബുധത്തിലേക്ക് നയിക്കാം.

ആഹാരത്തില്‍ പ്രോസസ് ചെയ്ത ഇറച്ചിയുടെ അധികമായ ഉപയോഗം, കൃത്രിമമായി നിറങ്ങളും രുചിയും, പ്രിസര്‍വേറ്റീവുകളും ചേര്‍ത്ത് ലഭിക്കുന്ന ഭക്ഷണം എന്നിവ  കാന്‍സറിന് കാരണമായേക്കാം