Thursday 23rd of March 2017

കാഴ്ചയുടെ വസന്തങ്ങളിലൂടെ പ്രഥമപൗരന്റെ സഞ്ചാരം

Category: Entertainment
Published: Friday, 03 March 2017
 
 
കൊച്ചി: ഒറ്റച്ചുമരില്‍ വിരിഞ്ഞ പറയിപെറ്റ പന്തിരുകുലത്തിന്റെ ചുമര്‍ചിത്ര കഥയറിഞ്ഞും ശബദ്മര്‍മ്മരങ്ങളുരുവിടുന്ന ഭപ്രൈം'മിന്റെ ബെഞ്ചിലിരുന്നും അഭയാര്‍ഥി സംരക്ഷണത്തിലെ പരാജയങ്ങള്‍ ഓര്‍മപ്പെടുത്തുന്ന ജലവിതാനമായ ദി സീ ഓഫ് പെയിനിലൂടെ സഞ്ചരിച്ചും കൊച്ചി മുസരിസ് ബിനാലെയുടെ കാഴ്ചകളില്‍ മതിമറന്ന് ഇന്ത്യയുടെ പ്രഥമപൗരന്‍. വൈകിട്ട് 4.47ന് ബിനാലെയുടെ വേദികളിലൊന്നായ ഫോര്‍ട്ട് കൊച്ചിയിലെ ആസ്പിന്‍വാളിലെത്തിയ രാഷ്ട്രപതി പ്രണബ് മുഖര്‍ജിയും ഗവര്‍ണര്‍ ജസ്റ്റിസ് പി. സദാശിവവും മുഖ്യമന്ത്രി പിണറായി വിജയനും ആദ്യം കണ്ടത് പി.കെ. സദാനന്ദന്റെ പറയിപെറ്റ പന്തിരുകുലമെന്ന ചുമര്‍ചിത്രമായിരുന്നു.
പറയിപെറ്റ പന്തിരുകുലത്തിന്റെ കഥയും കേരളത്തിലെ ചുവര്‍ചിത്രങ്ങളില്‍ നിന്ന് ഇവയെങ്ങനെ വ്യത്യാസപ്പെട്ടു നില്‍ക്കുന്നുവെന്നും സദാനന്ദന്‍ രാഷ്ട്രപതിക്ക് വിശദീകരിച്ചുനല്‍കി. അജന്ത ചുവര്‍ചിത്രങ്ങളിലുപയോഗിച്ചിരിക്കുന്ന പ്രകൃതിദത്തനിറങ്ങളാണ് ഇതിനുപയോഗിച്ചതെന്ന വിവരം രാഷ്ട്രപതി ചോദിച്ചറിഞ്ഞു. ചണ്ഡീഗഡ് സ്വദേശി ഗൗരി ഗില്ലിന്റെ മരുഭൂമികളിലെ ശവക്കൂനകളെ ചിത്രീകരിക്കുന്ന ട്രേസസ് കണ്ട ശേഷം ഇലക്ട്രിക് വാഹനമായ ബഗ്ഗിയിലാണ് വിശിഷ്ടവ്യക്തികള്‍ മറ്റ് ഇന്‍സ്റ്റലേഷനുകള്‍ കാണാനിറങ്ങിയത്.
റൗള്‍ സുറീതയുടെ ദി സീ ഓഫ് പെയിന്‍, കമീല്‍ നോര്‍മെന്റിന്റെ പ്രൈം, അലേഷ് ഷ്റ്റെയ്ഗറിന്റെ ദ പിരമിഡ് ഓഫ് എക്സൈല്‍ഡ് പോയറ്റ്്സ് എന്നീ ഇന്‍സ്റ്റലേഷനുകളും രാഷ്ട്രപതി കണ്ടു. പ്രൈമിലെ ബെഞ്ചുകളിലെ ശ്രേണിയിലിരുന്ന് രാഷ്ട്രപതിയും ഗവര്‍ണറും മുഖ്യമന്ത്രിയും ടൂറിസം മന്ത്രി കടകംപള്ളി സുരേന്ദ്രനും ശബ്ദമര്‍മ്മരങ്ങള്‍ ശ്രദ്ധിച്ചു. 5.11 ഓടെ ആസ്പിന്‍വാളില്‍നിന്ന് രാഷ്ട്രപതിയും സംഘവും മടങ്ങി. ഗവര്‍ണ്ണര്‍ ജസ്റ്റിസ് പി. സദാശിവം, മുഖ്യമന്ത്രി പിണറായി വിജയന്‍, ടൂറിസം വകുപ്പ് മന്ത്രി കടകംപള്ളി സുരേന്ദ്രന്‍, കെ.വി. തോമസ് എം.പി., മേയര്‍ സൗമിനി ജെയിന്‍, മൂന്‍ മന്ത്രി എം.എ. ബേബി, ബിനാലെ ക്യുറേറ്റര്‍മാരായ സുദര്‍ശന്‍ ഷെട്ടി, ബോസ് കൃഷ്ണമാചാരി, റിയാസ് കോമു, ജില്ല കളക്ടര്‍ മുഹമ്മദ് വൈ സഫീറുളള, എ.ഡി.ജി.പി. ബി. സന്ധ്യ, അസിസ്റ്റന്റ് കളക്ടര്‍ ഡോ. രേണു രാജ് എന്നിവരും ഒപ്പമുണ്ടായിരുന്നു.