Saturday 18th of August 2018

സി. കേശവനെ അനുസ്മരിച്ചു

Category: Thiruvananthapuram
Published: Tuesday, 07 July 2015
തിരുവനന്തപുരം: സാമൂഹ്യപരിഷ്കര്‍ത്താവും തിരുകൊച്ചി സംസ്ഥാനത്തെ മുഖ്യമന്ത്രിയുമായിരുന്ന സി. കേശവന്റെ 56-ാം ചരമവാര്‍ഷികദിനം ജില്ലയില്‍ വിവിധയിടങ്ങളില്‍ ആചരിച്ചു. വി.​എം. സുധീരന്‍, പന്ന്യന്‍ രവീന്ദ്രന്‍ തുടങ്ങി രാഷ്ട്രീയ രംഗത്തെ പ്രമുഖര്‍ മ്യൂസിയം ജംഗ്ഷനിലെ അദ്ദേഹത്തിന്റെ പ്രതിമയില്‍ പുഷ്പാര്‍ച്ചന നടത്തി. തുടര്‍ന്ന് ഇന്ദിരാ ഭവനില്‍ നടന്ന അനുസ്മരണ പരിപാടിയില്‍ വി.എം. സുധീരന്‍ , തെന്നല ബാലകൃഷ്ണപിള്ള തുടങ്ങിയവര്‍ പങ്കെടുത്തു.
1891 മെയ് 23ന് കൊല്ലം ജില്ലയില്‍ മയ്യനാട് ജനിച്ച സി. കേശവന്‍ ബോട്ടണി അധ്യാപകനായിരിക്കെ തിരുവനന്തപുരത്ത് നിന്ന് നിയമ ബിരുദം കരസ്ഥമാക്കി. 1932ല്‍ നിവര്‍ത്തന പ്രക്ഷോഭണം നടന്നത് എസ്.എന്‍.ഡി.പി. യോഗം സെക്രട്ടറിയായിരുന്ന അദ്ദേഹത്തിന്റെ നേതൃത്വത്തിലാണ്. 1935 ജൂലൈ 7ന് കോഴഞ്ചേരിയില്‍ അന്നത്തെ ദിവാനായിരുന്ന സര്‍ സി.പിക്കെതിരെ നടത്തിയ വിവാദ പ്രസംഗത്തെ തുടര്‍ന്ന് അദ്ദേഹം ജയിലില്‍ അടക്കപ്പെട്ടു. 1938ല്‍ തിരുവിതാംകൂര്‍ സ്റ്റേറ്റ് കോണ്‍ഗ്രസ്സിന്റെ ഭാഗമായ ശേഷം നിരവധി സ്വാതന്ത്യസമര പ്രക്ഷോഭങ്ങളില്‍ പങ്കെടുത്തിട്ടുണ്ട്. സ്വാതന്ത്യാനന്തരം പട്ടം താണുപിള്ള മന്ത്രിസഭയിലെ അംഗമായിരുന്നു. പിന്നീട് രാജി വച്ച അദ്ദേഹം 1951ല്‍ തിരുകൊച്ചി സംസ്ഥാനത്തിന്റെ മുഖ്യമന്ത്രിയായി. ജീവിതസമരം എന്ന പേരിലുള്ള സി. കേശവന്റെ ആത്മകഥ ഏറെ വായിക്കപ്പെട്ടിട്ടുള്ള കൃതിയാണ്.