Sunday 24th of February 2019

തലസ്ഥാനത്തിന് പുതിയ അനുഭവമായി സാക്‌സോഫോണ്‍ സംഗീതത്തിന്റെ നാദലയം

Category: Thiruvananthapuram
Published: Tuesday, 17 July 2018
തിരുവനന്തപുരം: നിശാന്ധി മണ്‍സൂണ്‍ സംഗീതോത്സവത്തില്‍ വ്യത്യസ്തവും പുതുമയുള്ളതുമായി പ്രമുഖ സാക്‌സോഫോണ്‍ കലാകാരി എം. എസ്. ലാവണ്യ നയിച്ച സാക്‌സോഫോണ്‍ സംഗീത കച്ചേരി. ശുദ്ധ കര്‍ണാടക സംഗീതത്തിന്റെ സാക്‌സോഫോണ്‍ അവതരണം ആസ്വാദിക്കാന്‍ തലസ്ഥാനത്തെ സംഗീതപ്രേമികള്‍ ഒഴുകിയെത്തി. സാക്‌സോഫോണിനൊപ്പം മൃദംഗം, വയലിന്‍, കഞ്ജീര, ഘടം എന്നീ വാദ്യോപകരണങ്ങളുടെ സംഗീത സമന്വയം രണ്ട് മണിക്കൂറോളം നീണ്ടുനിന്ന കച്ചേരി ആസ്വാദകര്‍ക്ക് പുത്തന്‍ അനുഭവമായി. മൃദംഗത്തില്‍ എം. ആര്‍. സൈനത്ത്, വയലിനില്‍ ഉഡുപ്പി എസ്. ശ്രീജിത്ത്, കഞ്ജീരയില്‍ ഉഡുപ്പി എസ്. ശ്രീകാന്ത്, ഘടത്തില്‍ ഉഡുപ്പി എസ്. ബാലകൃഷ്ണന്‍ എന്നിവര്‍ ലാവണ്യയ്ക്ക് പിന്തുണ നല്‍കി.
     ആറു വയസ് മുതല്‍ വയലിന്‍ അഭ്യസിച്ചുതുടങ്ങിയ ലാവണ്യ തന്റെ പതിനഞ്ചാം വയസില്‍ സാക്‌സോഫോണ്‍ മാന്ത്രികനായ പദ്മശ്രീ ഡോ. കദ്രി ഗോപാല്‍നാഥിന്റെ കീഴില്‍ അഭ്യസിച്ചു തുടങ്ങിയതാണ് വഴിത്തിരിവായത്. ഇന്ന് ഇന്ത്യയില്‍ അറിയപ്പെടുന്ന ഒരേയൊരു സാക്‌സോഫോണ്‍ കലാകാരി കൂടിയാണ് എം. എസ്. ലാവണ്യ. ലിംകാ ബുക്ക് ഓഫ് റെക്കോര്‍ഡ്‌സിലും ഇതിനോടകം ഇടംപിടിച്ചു. ദേശീയ അന്തര്‍ദേശീയ തലങ്ങളില്‍ 10,000 ത്തോളം വേദികളിലാണ് ലാവണ്യ തന്റെ സാക്‌സോഫോണ്‍ മാന്ത്രികത കാഴ്ചവെച്ചത്.
    പത്മഭാരതി അവാര്‍ഡ്, യുവകലാ ഭാരതി അവാര്‍ഡ് തുടങ്ങിയ പുരസ്‌കാരങ്ങളും ലാവണ്യ നേടിയിട്ടുണ്ട്. കര്‍ണാടിക്, ഹിന്ദുസ്ഥാനി, ഫ്യൂഷന്‍, വെസ്റ്റേണ്‍ എന്നിവയിലെല്ലാം ലാവണ്യ തന്റെ പാടവം കാഴ്ചവക്കുന്നു.