Friday 18th of January 2019

റോഡ് വികസനത്തിന് സ്ഥലലഭ്യത ഉറപ്പാക്കാന്‍ ജനങ്ങള്‍ ഉത്സാഹിക്കണം

Category: Thiruvananthapuram
Published: Thursday, 17 January 2019
തിരുവനന്തപുരം: സംസ്ഥാനത്തെ റോഡ് വികസന പദ്ധതികള്‍ സമയബന്ധിതമായി പൂര്‍ത്തിയാക്കുന്നതിനായി സ്ഥലം ലഭ്യമാക്കുന്നതിന് ജനങ്ങള്‍ ഉത്സാഹിക്കണമെന്നു പൊതുമരാമത്ത് മന്ത്രി ജി. സുധാകരന്‍. വികസന കാര്യത്തില്‍ സര്‍ക്കാര്‍ ആരോടും വേര്‍തിരിവു കാണിക്കില്ലെന്നും മന്ത്രി പറഞ്ഞു. പാറശാല നിയോജക മണ്ഡലത്തിലെ ആറാട്ടുകുഴി  അമ്പൂരി  നെയ്യാര്‍ഡാം റോഡിന്റെ ഉദ്ഘാടനം നിര്‍വഹിക്കുകയായിരുന്നു അദ്ദേഹം.
            തീരദേശ ഹൈവേ, മലയോര ഹൈവേ എന്നീ രണ്ടു ബ്രഹത് പദ്ധതികളിലായി 10,000 കോടി രൂപയുടെ റോഡ് വികസനമാണു സംസ്ഥാനത്തു നടക്കുന്നതെന്നു മന്ത്രി പറഞ്ഞു. ഇതിനു പുറമേയാണു നഗരങ്ങളിലും ഗ്രാമങ്ങളിലും പുതിയ റോഡുകള്‍ നിര്‍മിക്കുന്നതും നിലവിലുള്ള റോഡുകള്‍ വികസിപ്പിക്കുന്നതും. റോഡ് വികസനത്തിന് ആവശ്യമായ സ്ഥലം ലഭിക്കാത്തതാണു നിര്‍മാണ പദ്ധതികള്‍ വൈകിപ്പിക്കുന്നത്. ഇത്   ഒഴിവാക്കാന്‍ എല്ലാവരും ഉത്സാഹം കാണിക്കണം. തിരുവനന്തപുരം നഗരത്തിലും ജില്ലയുടെ വിവിധ ഭാഗങ്ങളിലും വലിയ തോതിലുള്ള റോഡ് വികസനമാണു നടക്കുന്നത്. കരമന  കളിയിക്കവിള റോഡിന്റെ രണ്ടാം ഘട്ട നിര്‍മാണം ഉടന്‍ ആരംഭിക്കും. കേരളത്തിലെ ഏറ്റവും വലിയ ഫ്‌ളൈ ഓവറായ ടെക്‌നോപാര്‍ക്ക്  കഴക്കൂട്ടം ഫ്‌ളൈ ഓവറിന്റെ നിര്‍മാണം തുടങ്ങിക്കഴിഞ്ഞു. ഗതാഗതത്തിനു തുറന്നുകൊടുത്ത ആറാട്ടുകുഴി  അമ്പൂരി  നെയ്യാര്‍ഡാം റോഡിന്റെ രണ്ടാം ഘട്ട നിര്‍മാണം മാര്‍ച്ചിനു മുന്‍പു പൂര്‍ത്തിയാക്കുമെന്നും മന്ത്രി പറഞ്ഞു.
               ആറാട്ടുകുഴി  നെയ്യാര്‍ ഡാം റീച്ചില്‍ കുട്ടപ്പൂ മുതല്‍ കണ്ടംതിട്ട വരെയുള്ള റോഡാണ് മന്ത്രി ഗതാഗതത്തിനു തുറന്നുകൊടുത്തത്. കണ്ടംതിട്ട മുതല്‍ ദൈവപ്പുര വരെയുള്ള രണ്ടാം ഘട്ടത്തിന്റെ നിര്‍മാണോദ്ഘാടനവും മന്ത്രി നിര്‍വഹിച്ചു. സി.കെ ഹരീന്ദ്രന്‍ എം.എല്‍.എ. അധ്യക്ഷത വഹിച്ച ചടങ്ങില്‍ പെരുങ്കിടവിള ബ്ലോക്ക് പഞ്ചായത്ത് പ്രസിഡന്റ് പി. സുജാത കുമാരി, അമ്പൂരി പഞ്ചായത്ത് പ്രസിഡന്റ് ബി. ഷാജി, വൈസ് പ്രസിഡന്റ് അനിത മധു, സ്റ്റാന്‍ഡിങ് കമ്മിറ്റി അധ്യക്ഷന്മാരായ ചിറക്കോട് വിജയന്‍, വത്സല രാജു, ലത സുരേന്ദ്രന്‍, പി.ഡബ്ല്യു.ഡി. സൂപ്രണ്ടിങ് എന്‍ജിനീയര്‍ ജി. ഉണ്ണിക്കൃഷ്ണന്‍ നായര്‍ തുടങ്ങിയവര്‍ പങ്കെടുത്തു. മണ്ഡലത്തിലെ മറ്റു രണ്ടു വലിയ റോഡുകളുടെ ഉദ്ഘാടനവും മന്ത്രി നിര്‍വഹിച്ചു. പെരുങ്കടവിള, കുന്നത്തുകാല്‍ പഞ്ചായത്തുകളെ ബന്ധിപ്പിക്കുന്ന പെരുങ്കടവിള  കുന്നത്തുകാല്‍ റോഡും ചായ്‌കോട്ടുകോണം  മഞ്ചവിളാകം  കുന്നത്തുകാല്‍ റോഡും മന്ത്രി നാടിനു സമര്‍പ്പിച്ചു.